اسْتَسْقٰى

اَلسَّقْیُ وَالسُّقْیَا کے معنیٰ پینے کی چیز دینے کے ہیں۔ اور اِسْقَائُ کے معنیٰ پینے کی چیز پیش کردینے کے ہیں تاکہ حسبش منشا لے کر پی لے لہٰذا اِسْقَاء بنسبت سَقْیٌ کے زیادہ بلیغ ہے کیونکہ اِسْقَاء میں مَاسَقٰی مِنْہٗ کے پیش کردینے کا مفہوم پایا جاتا ہے کہ پینے والا جس قدر چاہے اس سے نوش فرمالے۔ مثلاً: اَسْقَیْتُہٗ نَھَرًا کے معنیٰ یہ ہوں گے کہ میں نے اسے پانی کی نہر پر لے جاکر کھڑا کردیا۔ چنانچہ قرآن پاک سَقْیٌ کے متعلق فرمایا: (وَ سَقٰہُمۡ رَبُّہُمۡ شَرَابًا طَہُوۡرًا) (۷۶:۲۱) اور ان کو نہایت پاکیزہ شراب پلائے گا۔ (وَ سُقُوۡا مَآءً حَمِیۡمًا) (۴۷:۱۵) اور ان کو کھولتا ہوا پانی پلایا جائے گا۔ (وَ الَّذِیۡ ہُوَ یُطۡعِمُنِیۡ وَ یَسۡقِیۡنِ) (۲۶:۸۹) اور وہ مجھے کھلاتا اور پلاتا ہے۔ اور اِسْقَاء کے متعلق فرمایا: (وَّ اَسۡقَیۡنٰکُمۡ مَّآءً فُرَاتًا) (۷۷:۲۷) اور تم لوگوں کو میٹھا پانی پلایا۔ (فَاَسۡقَیۡنٰکُمُوۡہُ) (۱۵:۲۲) اور ہم ہی تم کو اس کا پانی پلاتے ہیں۔ اور آیت کریمہ میں: (نُسۡقِیۡکُمۡ مِّمَّا فِیۡ بُطُوۡنِہَا) (۲۳:۲۱) (کہ) جو ان کے پیٹوں میں ہے اس سے ہم تمہیں (دودھ) پلاتے ہیں۔ میں ایک قرأت فتحہ نون کے ساتھ بھی ہے۔ سِقْیٌ کے معنیٰ پانی کا حصہ اور سیراب شدہ زمین دونوں آتے ہیں کیونکہ سِقْیٌ بمعنیٰ مَسْقِیٌّ (اسم مفعول) کے ہے۔ جیسے نِقْضٌ بمعنیٰ مَنْقُوضٌ ہے۔ اور یہ دونوں چیزیں بھی مفعول بنتی ہیں اس لئے سِقْیٌ کا لفظ ان دونوں چیزوں پر بولا جاتا ہے۔ اَلْاِسْتِسْقَائُ کے معنیٰ کسی سے پانی طلب کرنے کے ہیں چنانچہ قرآن پاک میں ہے: (وَ اِذِ اسۡتَسۡقٰی مُوۡسٰی) (۲:۶۰) اور جب موسیٰ علیہ السلام نے اپنی قوم کے لئے (اﷲ سے) پانی مانگا۔ اَلسِّقَائُ: (مشکیزہ) وہ برتن جس میں پینے کی چیز رکھی جائے اسی سے ہے: اَسْقَیْتُکَ جِلْدًا کہ میں نے تمہیں (مشکیرہ بنانے کے لئے چمڑا دیا) اور آیت کریمہ: (جَعَلَ السِّقَایَۃَ فِیۡ رَحۡلِ اَخِیۡہِ ) (۱۲:۷۰) (تو) اپنے بھائی کے شلیتے میں پینے کا برتن رکھ دیا۔ میں سِقَایَۃٌ سے مراد وہی ہے جسے (بعد کی آیت میں) صُوَاعَ الْمَلِکِ کہا گیا ہے اس ایک ہی برتن کے یہ دو نام دو اعتبار سے ہیں یعنی اس کے ساتھ پانی پینے کے لحاظ سے اسے سِقَایَۃٌ کہا ہے اور اس لحاظ سے کہ اس کے ساتھ غلہ ناپا جاتا ہے سے صُوَاع کہہ دیا ہے۔