Islamic Sayings

بسر بن جاںش قرشی سےمروی ہے کہتے ہیں کہ رسول اللہ صلی اللہ علیہ وسلم نے یہ آیات تلاوت فرمائیں:فَمَالِ الَّذِیۡنَ کَفَرُوۡا قِبَلَکَ مُہۡطِعِیۡنَ ﴿ۙ۳۶﴾ عَنِ الۡیَمِیۡنِ وَ عَنِ الشِّمَالِ عِزِیۡنَ ﴿۳۷﴾ اَیَطۡمَعُ کُلُّ امۡرِیًٔ مِّنۡہُمۡ اَنۡ یُّدۡخَلَ جَنَّۃَ نَعِیۡمٍ ﴿ۙ۳۸﴾ کَلَّا ؕ اِنَّا خَلَقۡنٰہُمۡ مِّمَّا یَعۡلَمُوۡنَ ﴿۳۹﴾ ترجمہ:”تو ان کافروں کو کیا ہوا ہے کہ تمہاری طرف دوڑے چلے آتے ہیں۔اور دائیں بائیں سے گروہ گروہ ہو کر (جمع ہوتے جاتے ہیں)۔کیا ان میں سے ہر شخص یہ توقع رکھتا ہے کہ نعمت والی جنتوں میں داخل کیا جائے گا؟ہرگز نہیں،ہم نے ان کو اس چیز سے پیدا کیا ہے جسے وہ جانتے ہیں“۔ پھر رسول اللہ صلی اللہ علیہ وسلم نے اپنی ہتھیلی پر لعاب مبارک ڈالا اور فرمایا: اللہ تعالیٰ فرماتا ہے : اے ابن آدم!تم مجھے عاجز سمجھتے ہو حالانکہ میں نے تمہیں اسی چیز سے پیدا کیا، پھر تمہیں برابر کیا تمہاراجوڑ جوڑ درست مقام پر لگایا۔ (اور جب) تم دو دھاری دار چادروں میں چلتے ہو اور زمین تم سے شکوہ کرتی ہے، پھر تم نے(مال) جمع کیا اور روک کر رکھ لیا، حتی کہ جب تمہاری جان نکلنے لگی تو تم کہنے لگے: میں صدقہ کرتا ہوں، اب صدقے کا وقت کہاں ؟