حارث بن زیاد ساعدی رضی اللہ عنہ سے مروی ہے کہ: وہ خندق کے موقع پر رسول اللہ صلی اللہ علیہ وسلم کے پاس آئے۔ آپ صلی اللہ علیہ وسلم لوگوں سے ہجرت پر بیعت لے رہے تھے۔ کہنے لگے: اے اللہ کے رسول! اس سے بیعت لیجئے۔ آپ صلی اللہ علیہ وسلم نے فرمایا: یہ کون ہے ؟حارث رضی اللہ عنہ نے کہا: میرے چچا کا بیٹا حوط بن یزید یا یزید بن حوط ۔رسول اللہ صلی اللہ علیہ وسلم نے فرمایا: نہیں، میں تم سے بیعت نہیں لوں گا۔ لوگ تمہاری طرف ہجرت کریں گےتم ان کی طرف ہجرت نہیں کرو گے ۔ اس ذات کی قسم جس کے ہاتھ میں محمد صلی اللہ علیہ وسلم کی جان ہے ! جو شخص بھی انصار سے محبت کرے گا حتی کہ اللہ تبارک و تعالیٰ سے ملاقات کر لے تو اللہ تبارک و تعالیٰ بھی اس سے محبت کرتا ہوا ملاقات کرے گا۔ اور جو شخص بھی انصار سے بغض رکھے گا حتی کہ اللہ تبارک و تعالیٰ سے ملاقات کرلے تو اللہ تبارک و تعالیٰ بھی اس سے بغض رکھتے ہوئے ملاقات کرے گا۔
