عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم (مکے کی طرف )چلے تو مدینے پر ابو رہم کلثوم بن حسین غفاری رضی اللہ عنہ کو نگران مقرر کیا۔ دس رمضان کو سفر پر نکلے، رسول اللہ صلی اللہ علیہ وسلم اور صحابہ نے روزہ رکھا ہوا تھا۔ جب (کدید )میں پہنچے جو عسفان اور( امج) کے درمیان ہے۔تو آپ نےافطار کر لیا، پھر چل پڑے جب دس ہزار کے لشکر کے ساتھ جس میں مزینہ سلیم اور ہر قبیلے سے مسلمانوں کی اچھی خاصی تعداد موجود تھی۔ (مرالظہران) میں پڑاؤ ڈالا، مہاجرین و انصار سب کے سب آپ صلی اللہ علیہ وسلم کے ساتھ نکلے، کوئی بھی شخص آپ سے پیچھے نہیں رہا، جب رسول اللہ صلی اللہ علیہ وسلم نے (مرالظہران) میں پڑاؤ ڈالا، قریش سے خبروں کا سلسلہ منقطع ہوگیا تھا، اور انہیں رسول اللہ صلی اللہ علیہ وسلم کی کوئی اطلاع نہیں تھی۔ نہ یہ جانتے تھے کہ آپ کیا کرنے والے ہیں؟ اس رات ابو سفیان بن حرب، حکیم بن حزام اور بدیل بن ورقاء یہ دیکھنے کے لئےباہر نکلے کہ کیا انہیں کوئی خبر یا کوئی سن گن ملتی ہے؟ عباس بن عبدالمطلب رضی اللہ عنہ رسول اللہ صلی اللہ علیہ وسلم سے راستے میں آملے تھے۔ اور ابوسفیان بن حارث بن عبدالمطلب اور عبداللہ بن امیہ بن مغیرہ بھی مکہ اور مدینہ کے درمیان آئے اور آپ سے ملنے کی خواہش کی۔ ام سلمہ رضی اللہ عنہا نے ان دونوں کے بارے میں بات چیت کی ۔کہنے لگیں: اے اللہ کے رسول! آپ کے چچا کا بیٹا اور پھوپھی کا بیٹا اور داماد۔آپ صلی اللہ علیہ وسلم نے فرمایا: مجھے ان دونوں سے کوئی غرض نہیں۔ میرے چچا کے بیٹے نے میری عزت خراب کی ہے، اور میری پھوپھی کےاس بیٹے نے مکے میں کیا کچھ نہیں کہا۔ جب ان کی طرف یہ پیغام پہنچا تو ابو سفیان کے ساتھ اس کا چھوٹا بیٹا بھی تھا، کہنے لگا:واللہ یا توآپ مجھے اجازت دے دیں یا میں اپنے اس بیٹے کا ہاتھ پکڑ کر بیابان میں نکل جاؤں گا۔ یہاں تک کہ ہم بھوک اور پیاس سے مر جائیں ۔ جب رسول اللہ صلی اللہ علیہ وسلم تک یہ بات پہنچی تو آپ کا دل نرم ہوگیا۔ پھر ان دونوں کو اجازت دے دی، وہ دونوں آپ کی خدمت میں حاضر ہوئے اور اسلام قبول کر لیا۔ جب رسول اللہ صلی اللہ علیہ وسلم نے مرالظہران میں پڑاؤ ڈالا تو عباس رضی اللہ عنہ کہنے لگے قریش کی صبح بری حالت ہوگی۔ واللہ! اگر رسول اللہ صلی اللہ علیہ وسلم قریش کے امان طلب کرنے سے پہلے جنگ کرتے ہوئے مکے میں داخل ہوگئے تو یہ ہمیشہ کے لئے قریش کی ہلاکت ہے۔ پھر میں رسول اللہ صلی اللہ علیہ وسلم کے سفید خچر پر بیٹھا اور اس پر بیٹھ کر اراک تک آگیا۔ میں نےسوچا: شاید میں کسی لکڑہارے، دودھ والے یا کسی ضرورتمند سے ملوں تاکہ وہ مکہ والوں کو رسول اللہ صلی اللہ علیہ وسلم کے پڑاؤ کی خبر دے اور مکے والے مکے میں جنگی حالت میں داخل ہونے سے پہلے آپ صلی اللہ علیہ وسلم کے پاس آکر آپ سے امان طلب کریں ۔ واللہ! میں اس پر سوار کسی شخص کو تلاش کرتا رہا کہ میں نے ابو سفیان اور بدیل بن ورقاء کی بات سنی وہ دونوں آپس میں بات چیت کر رہے تھے۔ابو سفیان کہہ رہا تھا: آج کے دن جیسی آگ اور لشکر میں نے نہیں دیکھا۔ بدیل کہہ رہا تھا: یہ واللہ خزاعہ کی آگ ہے جنہیں جنگ نے برانگیختہ کردیا ہے۔ ابو سفیان کہہ رہا تھا: خزاعہ کی واللہ اتنی حیثیت کہاں کہ وہ اتنی آگ جلائے اور اتنا بڑا لشکر لائے۔ میں نے اس کی آواز پہچان لی۔ میں نے کہا: ابو حنظلہ؟ انہوں نے میری آواز پہچان لی اور کہنے لگے: ابو الفضل ہو؟ میں نے کہا: ہاں، کہنے لگے: میرے ماں باپ آپ پر قربان ہوں آپ کو کیا ہوا؟ میں نے کہا: ابو سفیان! افسوس یہ رسول اللہ صلی اللہ علیہ وسلم لوگوں کے ساتھ ہیں اور قریش کی باری آگئی واللہ۔ کہنے لگے: میرے ماں باپ آپ پر قربان ہوں! اس سے بچنے کا کیا طریقہ ہے؟ میں نے کہا: واللہ اگر وہ تم پر حاوی ہوگئے تو تمہاری گردن اڑادیں گے۔ میرے ساتھ اس خچر پر سوار ہو جاؤ تاکہ میں تمہیں رسول اللہ صلی اللہ علیہ وسلم کے پاس لے جا کر آپ صلی اللہ علیہ وسلم سے تمہارے لئے امان طلب کروں۔ وہ میرے پیچھے سوار ہوگئے، اور ان کے دونوں ساتھی واپس لوٹ گئے۔ میں نے سواری چلائی، میں جب بھی مسلمانوں کی کسی آگ کے پاس سے گزرتا تو کہتے: یہ کون ہے؟ پھر جب وہ رسول اللہ صلی اللہ علیہ وسلم کا خچر دیکھتے تو کہتے:رسول اللہ صلی اللہ علیہ وسلم کے چچا آپ کے خچر پر سوار ہیں۔ جب میں عمر بن خطابرضی اللہ عنہ کی آگ کے پاس سے گزرا تو انہوں نے کہا: یہ کون ہے؟ اور میری طرف آنے لگے: جب انہوں نے ابو سفیان کو خچر کے پیچھے دیکھا تو کہنے لگے: ابو سفیان! اللہ کا دشمن؟ الحمدللہ! جس نے بغیر کسی عہدو پیماں کے تم پر غالب کر دیا۔ پھر رسول اللہ صلی اللہ علیہ وسلم کی طرف دوڑنے لگے۔ میں نے بھی خچر کو ایڑ لگائی تو میں ان سے پہلے پہنچ گیا جیسا کہ سست جانور بھی سست آدمی سے سبقت لے جاتا ہے۔ میں نے خچر سے چھلانگ لگا دی۔ میں رسول اللہ صلی اللہ علیہ وسلم کے پاس پہنچا تو اوپر سے عمررضی اللہ عنہ پہنچ گئے اور کہنے لگے: اے اللہ کے رسول! یہ ابو سفیان ہے۔ اللہ تعالیٰ نے بغیر کسی عہدو پیمان کے اس پر غلبہ دے دیا ہے۔مجھے اجازت دیجئے میں اس کی گردن اڑاؤں، میں نے کہا: اے اللہ کے رسول ! میں نے اسے پناہ دی ہے۔ پھر میں رسول اللہ صلی اللہ علیہ وسلم کے پاس بیٹھ گیا اور آپ کا سر پکڑ لیا میں نے کہا: نہیں واللہ! آج کی رات میرے علاوہ کوئی شخص آپ صلی اللہ علیہ وسلم سے بات نہیں کریگا ۔ جب عمررضی اللہ عنہ نے ان کے بارے میں زیادہ کہا تو میں نے کہا: عمر! بس کرو، واللہ اگر یہ بنی عدی بن کعب کا آدمی ہوتا تو تم اس کے بارے میں اتنا نہ کہتے، لیکن تمہیں معلوم ہے کہ یہ بنی عبد مناف کا ایک شخص ہے۔ عمررضی اللہ عنہ کہنے لگے: عباس چھوڑو، واللہ جس دن تم اسلام لائے تمہارا اسلام لانا مجھے (میرے باپ) خطاب کے اسلام لانے سے زیادہ محبوب ہے اگر وہ یہ اس لئے کہ مجھے معلوم ہے کہ آپ کا اسلام لانا رسول اللہ صلی اللہ علیہ وسلم کو (میرے باپ) خطاب کے اسلام لانے سے زیادہ محبوب ہے۔ رسول اللہ صلی اللہ علیہ وسلم نے فرمایا: عباس اسے خیمے میں لے جاؤ، جب صبح ہوجائے تو اسے میرے پاس لے آنا۔ میں ابو سفیان کو اپنے خیمے میں لے گیا۔ انہوں نے رات میرے خیمے میں گزاری، جب صبح ہوئی تو میں رسول اللہ صلی اللہ علیہ وسلم کے پاس لے کر آیا۔ جب رسول اللہ صلی اللہ علیہ وسلم نے اسے دیکھا تو فرمایا: ابو سفیان! افسوس ہے، کیا تمہیں ابھی بھی معلوم نہیں ہوا کہ اللہ کے علاوہ کوئی سچا معبود نہیں؟ ابو سفیان نے کہا: میرے ماں باپ آپ پر قربان، آپ کتنے معزز(بردبار) اور تعلق داری والے ہیں، واللہ اگر اللہ کے ساتھ کوئی اور ہوتا (اس صورتحال کے بعد )ضرور میری مدد کرتا۔ آپ صلی اللہ علیہ وسلم نے فرمایا: ابو سفیان !افسوس! کیا ابھی وقت نہیں آیا کہ تمہیں معلوم ہو کہ میں اللہ کا رسول ہوں؟ ابو سفیان نے کہا: میرے ماں باپ آپ پر قربان آپ کتنے :بردبار معزز اور تعلق داری والے ہیں، اس بارے میں میرے دل میں ابھی کچھ شک شبہہ ہے۔ عباسرضی اللہ عنہ نے کہا: ابو سفیان افسوس! اس سے پہلے کہ تمہاری گردن ماردی جائےاسلام لے آؤ اور لا اله الا اللہ محمد رسول اللہ کی گواہی دو۔ تب ابو سفیان نے حق کی گواہی دی اور مسلمان ہوگئے۔ میں نے کہا: اے اللہ کے رسول! ابو سفیان ایسا شخص ہے جو فخر کو پسند کرتا ہے، اس کے لئے کوئی خاص بات فرما دیجئے۔ آپ صلی اللہ علیہ وسلم نے فرمایا: ٹھیک ہے جو شخص ابو سفیان کے گھر میں داخل ہوا وہ امن میں ہے۔ جس شخص نے اپنا دروازہ بند کر لیا، وہ امن میں ہے اور جو مسجد میں داخل ہو گیا وہ امن میں ہے۔جب وہ جانے کے لئے مڑے تو رسول اللہ صلی اللہ علیہ وسلم نے فرمایا: عباس !پہاڑ کے سرے کے پاس تنگ گھاٹی میں اسے روک لو، تاکہ اللہ کے لشکر گزریں تو یہ دیکھ سکے۔ کہا: میں ابو سفیان کو لے کر باہر نکلا اور جہاں رسول اللہ صلی اللہ علیہ وسلم نے مجھے ابو سفیان کو روکنے کا حکم دیا تھا میں نے اسے روک لیا۔ قبائل اپنے جھنڈوں کے ساتھ گزرنے لگے۔ جب کبھی کوئی قبیلہ گزرتا تو ابو سفیان کہتے: یہ کون ہیں؟ میں کہتا (سلیم) وہ کہتے مجھے( سلیم) سے کیا واسطہ؟ پھر ایک قبیلہ گزرا تو انہوں نے کہا: یہ کون ہیں؟ میں نے : (مزینہ) وہ کہنے گلے:(مزینہ) سے میرا کیا تعلق۔ حتی کہ کئی قبائل گزر گئے، جب کوئی قبیلہ گزرتا تو کہتے یہ کون ہیں؟ میں کہتا: فلاں وہ کہتے: مجھے فلاں سے کیا واسطہ؟ حتی کہ رسول اللہ صلی اللہ علیہ وسلم ایک بڑے لشکر کے ساتھ گزرے جس میں مہاجرین اور انصار تھے ۔جن پر لوہے کی زر ہیں تھی اور صرف ان کی آنکھیں دکھائی دے رہی تھیں۔ ابو سفیان نے کہا: سبحان اللہ !عباس! یہ کون لوگ ہیں؟ میں نے کہا: یہ اللہ کے رسول صلی اللہ علیہ وسلم مہاجرین و انصار کے ساتھ ہیں۔ انہوں نے کہا: ان کے مقابلے میں تو کسی کی قوت و طاقت نہیں۔ ابو الفضل! واللہ! تمہارے بھتیجے کی بادشاہت عظیم ہوگئی۔ میں نے کہا: ابو سفیان یہ نبوت ہے(بادشاہت نہیں) ابو سفیان نے کہا: تب تو یہ بہت اچھی ہے۔ میں نے کہا: اپنی قوم کی نجات کا اعلان کرو۔ وہ وہاں سے چل کر اپنی قوم کے پاس آئے اور بلند آوازسے کہنے لگے: اے قریش کی جماعت! یہ محمد صلی اللہ علیہ وسلم ہیں، تمہارے پاس ایسا لشکر لائےہیں جس کا کوئی مدمقابل نہیں، جو شخص ابو سفیان کے گھر میں داخل ہوا وہ امن میں ہے۔ اس کی بیوی ہند بنت عتبہ اس کے پاس آئی اور اس کی مونچھوں سے پکڑ کر کہا: اسع چربی سے بھرے ہوئے پتلی پنڈلیوں والے کو قتل کردو، یہ قوم کا بری خبر کا اطلاع دہندہ ہے۔ ابو سفیان کہنے لگے: تم پر افسوس! یہ عورت تمہیں دھوکے میں نہ ڈال دے، کیوں کہ آپ صلی اللہ علیہ وسلم ایسا لشکر لائے ہیں جس کا کوئی مقابل نہیں، جو شخص ابو سفیان کے گھر میں داخل ہوگیا وہ امن میں ہے ۔لوگ کہنے لگے: تو برباد ہو، تیرا گھر کتنے لوگوں کو کافی ہوگا؟ ابو سفیان نے کہا: جس شخص نے اپنا دروازہ بند کر لیا وہ امن میں ہے۔ جو مسجد میں داخل ہو گیا وہ امن میں ہے۔ تب لوگ اپنے گھروں اور مسجد کی طرف چلے گئے۔
ابو سعید خدریرضی اللہ عنہ سے مروی ہے کہ ایک دن رسول اللہ صلی اللہ علیہ وسلم مال تقسیم فرما رہے تھے کہ آپ کے پاس ذوالخویصرہ۔بنی تمیم کا ایک فرد۔ آیا اور کہنے لگا: اے محمد( صلی اللہ علیہ وسلم )انصاف کیجئے۔ اللہ کی قسم! آج کے دن آپ نے انصاف نہیں کیا۔ نبی صلی اللہ علیہ وسلم نے فرمایا: تم میرے بعد کوئی ایسا شخص نہیں دیکھو گے جو مجھ سے زیادہ عدل کرنے والا ہو۔ آپ نے تین مرتبہ فرمایا: عمررضی اللہ عنہ کہنے لگے: اے اللہ کے رسول! کیا آپ مجھے اجازت دیتے ہیں کہ میں اس کی گردن اڑادوں؟ آپ صلی اللہ علیہ وسلم نے فرمایا: نہیں اس کے ایسے ساتھی ہیں کہ تم میں سے کوئی شخص اپنی نماز ان کے مقابلے میں حقیر سمجھے گا۔۔۔
ام ہانی بنت ابی طالب رضی اللہ عنہا کہتی ہیں کہ فتح مکہ کے موقع پر میں نے اپنے دو دیوروں کو پنا ہ دی، اور ان دونوں کو گھر میں لا کر دروازہ بند کر دیا۔ میرا ماں زاد(اخیافی) بھائی علی بن ابی طالب رضی اللہ عنہ آئے اور ان دونوں پر تلوار سونت لی۔ کہتی ہیں میں نبی صلی اللہ علیہ وسلم کے پاس آئی تو آپ مجھے نہیں ملے۔ فاطمہ رضی اللہ عنہا مل گئی وہ اپنے شوہر سے بھی زیادہ مجھ پر دباؤ ڈالنے لگیں۔ کہتی ہیں پھر نبی صلی اللہ علیہ وسلم آئے آپ پر گردو غبار پڑا ہوا تھا میں نے آپ کو بتایا تو آپ صلی اللہ علیہ وسلم فرمانے لگے: ام ہانی! جسے تم نے پناہ دی ہم نے بھی اسے پناہ دی، اور جسے تم نے امان دی ہم نے بھی اسے امان دی
ربیعہ اسلمی رضی اللہ عنہ سے مروی ہے کہتے ہیں کہ میں رسول اللہ صلی اللہ علیہ وسلم کی خدمت کیا کرتا تھا۔ آپ نےمجھے زمین کا ایک ٹکڑا دیا، اور ابو بکررضی اللہ عنہ کو بھی زمین کا ایک ٹکڑا دیا۔ دنیا کی لالچ آ گئی کہ ہم کھجور کے ایک درخت میں جھگڑنے لگے۔ ابو بکررضی اللہ عنہ نے کہا: یہ میری زمین کی حد میں ہے اور میں نے کہا: یہ میری زمین کی حد میں ہے۔ میرے اور ابو بکررضی اللہ عنہ کے درمیان تلخ کلامی ہونے لگی۔ ابو بکر رضی اللہ عنہ نے مجھے ایسی بات کہی جو مجھے نا پسند لگی۔ وہ شرمندہ ہوگئے ۔اور مجھ سے کہنے لگے: ربیعہ! مجھے بھی ایسی بات کہو تاکہ بدلہ ہو جائے۔ میں نے کہا: میں ایسا کام نہیں کروں گا۔ ابو بکررضی اللہ عنہ نے کہا: تم ایسا ضرور کہو گے وگرنہ میں تمہارے خلاف رسول اللہ صلی اللہ علیہ وسلم سےمدد طلب کروں گا، میں نے کہا :میں ایسا نہیں کروں گا۔ اور زمین چھوڑ دی، ابو بکررضی اللہ عنہ نبی صلی اللہ علیہ وسلم کے پاس چلے، میں بھی ان کے پیچھے پیچھے چلا بنو اسلم کے کچھ آدمی آئے اور کہنے لگے: اللہ تعالیٰ ابو بکر رضی اللہ عنہ پر رحم کرے! کس بارے میں یہ تمہارے خلاف رسول اللہ صلی اللہ علیہ وسلم سےمدد مانگ رہے ہیں حالانکہ اس نے تم سے ایسی بات کہی ہے؟ میں نے کہا: کیا تم جانتے ہو؟ یہ کون ہے؟یہ ابو بکر صدیق رضی اللہ عنہ ہیں۔ ثانی اثنین (دونوں میں سے دوسرے) مسلمانوں میں بزرگی والے، تم اس بات سے بچو کہ وہ تمہیں دیکھ لے کہ تم اس کے خلاف میری مدد کر رہے ہو۔ وہ غصے ہو جائیں۔ وہ رسول اللہ صلی اللہ علیہ وسلم کے پاس آئیں اور آپ ان کے غصے کی وجہ سے غصے ہو جائیں او اللہ تعالیٰ ان دونوں کے غصے کی وجہ سے غصے ہو جائیں اور ربیعہ ہلاک ہو جائے۔ وہ کہنے لگے: پھر اب تم ہمیں کیا کہتے ہو؟ تم واپس چلے جاؤ، ابو بکررضی اللہ عنہ رسول اللہ صلی اللہ علیہ وسلم کے پاس گئے۔ میں اکیلا ان کے پیچھے گیا اور ان کے پیچھے پیچھے رہا حتی کہ وہ نبی صلی اللہ علیہ وسلم کے پاس پہنچ گئے اور جس طرح بات ہوئی بیان کر دی۔ آپ صلی اللہ علیہ وسلم نے میری طرف سر اٹھا کر کہا: ربیعہ تمہارا اور صدیق کا کیا معاملہ ہے؟ میں نے کہا: اے اللہ کے رسول! اس طرح بات ہوئی تھی، پھر انہوں نے مجھ سے ایک بات کہی جو مجھے نا پسند لگی تو انہوں نے مجھ سے کہا: جس طرح میں نے تم سے کہا ہے اس طرح تم بھی کہو تاکہ بدلہ ہو جائے (لیکن میں نے انکار کر دیا) رسول اللہ صلی اللہ علیہ وسلم نے فرمایا: ہاں، تم اس کی بات کا جواب نہ دو، لیکن تم کہو: ابو بکر! اللہ تمہیں معاف فرمائے۔ ابو بکر! اللہ تعالیٰ تمہیں معاف فرمائے پس میں نے کہا ابوبکر اللہ تعالیٰ تمہیں معاف فرمائے، کہتے ہیں پھر تو ابو بکر رضی اللہ عنہ اللہ ان پر رحم کرے۔ روتے ہوئے واپس چلے گئے۔
عاصم بن حمید سکونی سے مروی ہے کہتے ہیں کہ معاذرضی اللہ عنہ کو جب نبی صلی اللہ علیہ وسلم نے بھیجا تو نبی صلی اللہ علیہ وسلم انہیں وصیت کرنے باہر تک آئے معاذ رضی اللہ عنہ سوار تھے اور رسول اللہ صلی اللہ علیہ وسلم اس کی سواری کے ساتھ پیدل چل رہے تھے۔ جب فارغ ہوگئے تو کہنے لگے :معاذ! ممکن ہے تم مجھ سے اس سال کے بعد ملاقات نہ کر سکو، اور ممکن ہے تم میری (اس)مسجد اور میری قبر کے پاس سے گزرو، معاذ بن جبلرضی اللہ عنہ رسول اللہ صلی اللہ علیہ وسلم کی جدائی میں پھوٹ پھوٹ کر رونے لگے ۔نبی صلی اللہ علیہ وسلم نے فرمایا: معاذ! رو مت، یقیناًرونا شیطان کی طرف سے ہے۔
