اَیَّانَ : (کب) کسی شے کا وقت دریافت کرنے کے لیے استعمال ہوتا ہے اور یہ قریب قریب ’’متٰی‘‘ کے ہم معنی ہے۔ قرآن پاک میں ہے : (اَیَّانَ مُرسَاھَا) (۷۹:۴۲) کہ اس (قیامت) کا وقوع کب ہوگا۔ (وَ مَا یَشۡعُرُوۡنَ ۙ اَیَّانَ یُبۡعَثُوۡنَ ) (۱۶:۲۱) ان کو بھی یہ معلوم نہیں کہ کب اٹھائے جائیں گے۔ (اَیَّانَ یَوۡمُ الدِّیۡنِ ) (۵۱:۱۲) کہ جزا کا دن کب ہوگا۔ لفظ اَیَّانَ دراصل اَمیٌّ سے مشتق ہے اور بعض کے نزدیک اس کی اصل اَیُّ اَوَانٍ ہے جس کے معنی ہیں ’’کون سا وقت‘‘ الف کو حذف کر کے واو کو یاء اور پھر اسے یاء میں ادغام کرکے اَیَّانَ بنا لیا گیا ہے۔
