بُرْھَانَكُمْ

اَلْبُرھَانُ: کے معنی دلیل اور حجت کے ہیں اور یہ رُجْحَانٌ وَثُنْیَان کی طرح فُعْلَان کے وزن پر ہے۔ بعض کے نزدیک یہ بَرِہَ یَبْرَہُ کا مصدر ہے جس کے معنی سفید اور چمکنے کے ہیں۔ صفت اَبْرَہُ مونث بَرْھَائَ ج: بُرْہٌ اور نوجوان سپید رنگ حسینہ کو بَرْھَۃٌ کہا جاتا ہے۔ الْبَرھَۃُ: وقت کا کچھ حصہ لیکن بُرْھَان دلیل قاطع کو کہتے ہیں جو تمام دلائل سے زوردار ہو اور ہر حال میں ہمیشہ سچی ہو اس لیے کہ دلیل کی پانچ قسمیں ہیں۔ (۱) وہ جو ہمیشہ صدق کی مقتضی ہو۔ (۲) وہ جو ہمیشہ کذب کی مقتضی ہو۔ (۳) وہ جو اقرب الی الصدق ہو۔ (۴) جو کذب کے زیادہ قریب ہو۔ (۵) وہ جو اقتضاء صدق و کذب میں مساوی ہو۔ قرآن پاک میں ہے: (قُلۡ ہَاتُوۡا بُرۡہَانَکُمۡ اِنۡ کُنۡتُمۡ صٰدِقِیۡنَ ) (۲:۱۱۱) اے پیغمبرؐ ان سے کہہ دو کہ اگر تم سچے ہو تو دلیل پیش کرو۔ (قُلۡ ہَاتُوۡا بُرۡہَانَکُمۡ ہٰذَا ذِکۡرُ مَنۡ مَّعِیَ ) (۲۱:۲۴) کہہ دو کہ (اس بات پر) اپنی دلیل پیش کرو، یہ (میری اور) میرے ساتھ والوں کی کتاب بھی ہے۔ (قَدۡ جَآءَکُمۡ بُرۡہَانٌ مِّنۡ رَّبِّکُمۡ ) (۴:۱۷۴) تمہارے پاس دلیل (روشن) آچکی ہے۔