ابو نضرہ، عبداللہ بن مولہ سے بیان کرتے ہیں کہ: میں اہواز میں سے گزر رہا تھا، اچانک میں نے دیکھا کہ میرے سامنے ایک آدمی خچر پر سوار چل رہا ہے اور کہہ رہا ہے : اے اللہ! اس امت میں سے میرا زمانہ چلا گیا(میرا وقت ختم ہوگیا )، مجھے بھی ان کے ساتھ ملا دے، میں نے کہا: مجھے بھی اپنی دعا میں شامل کر لو، اس نے کہا: اور میرے اس ساتھی کو بھی اگریہ چاہے تو ،پھر کہنے لگا کہ: رسول اللہ صلی اللہ علیہ وسلم نے فرمایا: میری امت کے بہترین لوگ میرے زمانے والے ہیں پھر وہ لوگ جو ان سے متصل ہیں۔ مجھے نہیں معلوم کہ آپ نے تیسرے زمانے کا ذکر کیا یا نہیں۔ پھر ایسے لوگ آئیں گے جن میں موٹاپا ظاہر ہوگا، گواہی دیں گے حالانکہ ان سے گواہی طلب نہیں کی جائے گی۔ابو نضرہ نے کہا :میں نے دیکھا تو وہ ابو بریدہ اسلمی رضی اللہ عنہ تھے ۔
ابو ہریرہرضی اللہ عنہ سے مرفوعا مروی ہے کہ: میری امت کے بہترین لوگ وہ ہیں جن میں مجھے بھیجا گیا ہے، پھر وہ لوگ جو ان سے متصل ہیں(پھر وہ لوگ جو ان سے متصل ہیں۔)واللہ اعلم ،آپ نے تیسری صدی کا ذکر کیا یا نہیں۔ پھر ایسے لوگ آئیں گے جو موٹا پے کو پسند کریں گے ،گواہی مانگنے سے پہلے ہی گواہی دیں گے۔
عمران بن حصینرضی اللہ عنہ سے مرفوعا مروی ہے کہ: میری بہترین امت وہ لوگ ہیں جس زمانے میں مجھے بھیجا گیا ہے ۔ پھر وہ لوگ جو ان سے متصل ہیں، پھر وہ لوگ جو ان سے متصل ہیں۔ واللہ اعلم آپ نے تیسری صدی کا ذکر کیا یا نہیں۔پھر ایسے لوگ ظاہر ہوں گے جو گواہی دیں گے حالانکہ ان سے گواہی نہیں مانگی جائے گی، نذر مانیں گے لیکن پوری نہیں کریں گے، خیانت کریں گے ،امانت دار نہیں ہوں گے۔ اور ان میں موٹاپا ظاہر ہو جائے گا۔
عبداللہ بن عباس رضی اللہ عنہما سے مرفوعا مروی ہے کہ : اہل مشرق میں بہترین لوگ عبدالقیس ہیں، لوگ مجبوری میں مسلمان ہوئے اور وہ خوشی سے برضا و رغبت مسلمان ہوئے۔
اسیر بن جابر سے مروی ہے کہ عمر بن خطاب رضی اللہ عنہ نے اویس قرنی سے کہا: میرے لئے بخشش کی دعا کیجئے۔ اویس قرنی نے کہا: آپ کا زیادہ حق ہے کہ میرے لئے بخشش طلب کریں، آپ رسول اللہ صلی اللہ علیہ وسلم کے صحابی ہیں۔ عمررضی اللہ عنہ نے کہا: میں نے رسول اللہ صلی اللہ علیہ وسلم کو فرماتے ہوئے سنا: بہترین تابعی قرن قبیلے کا اویس نامی آدمی ہوگا۔
عمر بن خطابرضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: بہترین لوگ میرے زمانے والے ہیں، پھر وہ لوگ جو ان سے متصل ہیں(پھر وہ لوگ جو ان سے متصل ہیں)۔ پھر ایسے لوگ پیدا ہونگے جن میں موٹاپا غالب ہوگا، گواہی دیں گے حالانکہ گواہی مانگی نہیں جائے گی اور بازاروں میں شور شرابہ کریں گے۔
عمران بن حینلرضی اللہ عنہ سے مرفوعا مروی ہے کہ: بہترین لوگ میرے زمانے کے ہیں، پھر وہ لوگ جو ان سے متصل ہیں، پھر وہ لوگ جو ان سے متصل ہیں۔ پھر ایسے لوگ آئیں گے جو موٹے ہوں گے، موٹاپے کو پسند کریں گے، گواہی مانگنے سے پہلے ہی گواہی دیں گے۔
عبداللہ بن مسعودرضی اللہ عنہ سے مرفوعا مروی ہے کہ: بہترین لوگ میرے زمانے کے ہیں، پھر وہ لوگ جو ان سے متصل ہیں، پھر وہ لوگ جو ان سے متصل ہیں۔ پھر ایسے لوگ آئیں گے کہ ان کی گواہی ان کی قسم سے سبقت لے جائے گی اور ان کی قسم ان کی گواہی سے سبقت لے جائے گی۔
ابو ہریرہرضی اللہ عنہ سے مرفوعا مروی ہے کہ: بہترین عورتیں جو اونٹوں کی سواری کرتی ہیں قریش کی نیک عورتیں ہیں، اپنے بچے پر بچپن میں نرم اور اپنے شوہر کے مال و منال کا خیال رکھنے والی ہیں
عامر شعبی سے مروی ہے، کہتے ہیں کہ رسول اللہ صلی اللہ علیہ وسلم نے امیہ کے تین آدمیوں کو تشبیہ دی ،دحیہ کلبی رضی اللہ عنہ کو جبرائیل سے مشابہت دی، عروہ بن مسعود ثقفی رضی اللہ عنہ کو عیسی بن مریم سے تشبیہ دی اور عبدالعزی کو دجال سے تشبیہ دی۔
عبداللہ بن بریدہ اپنے والد سے مرفوعا بیان کرتے ہیں کہ(رسول اللہ صلی اللہ علیہ وسلم نے فرمایا): میں جنت میں داخل ہوا تو ایک نوجوان لڑکی نے میرااستقبال کیا۔ میں نے کہا: تم کس کے لئے ہو؟ اس نے کہا: زید بن حارثہ رضی اللہ عنہ کے لئے۔
عائشہ رضی اللہ عنہا سے مرفوعا مروی ہے کہ (رسول اللہ صلی اللہ علیہ وسلم نے فرمایا): میں جنت میں داخل ہوا تو میں نے قراءت کی آواز سنی۔ میں نے کہا: یہ کون ہے؟ فرشتے کہنے لگے: حارثہ بن نعمان، اسی طرح نیک شخص ہوتا ہے ،اسی طرح نیک شخص ہوتا ہے ۔حارثہرضی اللہ عنہ اپنی والدہ سے بہت اچھا سلوک کرنے والے تھے۔
عبداللہ بن عمر رضی اللہ عنہما کہتے ہیں کہ نبی صلی اللہ علیہ وسلم کے پاس حاتم کا ذکر کیا گیا، آپ صلی اللہ علیہ وسلم نے فرمایا: وہ ایسا آدمی تھا جب کسی کام کا ارادہ کرتا تو اسے پالیتا تھا۔
مجاشع بن مسعود رضی اللہ عنہ کہتے ہیں کہ میں رسول اللہ صلی اللہ علیہ وسلم کے پاس فتح مکہ کے بعد اپنے بھائی مجالد کو لایا اور کہا: اے اللہ کے رسول! میں آپ کے پاس اپنے بھائی مجالد کو لایا ہوں، تاکہ آپ اس سے ہجرت پر بیعت لیں۔ آپ صلی اللہ علیہ وسلم نے فرمایا: اہل ہجرت، ہجرت کا اجر لے گئے، میں نے کہا: اے اللہ کے رسول! پھر کس بات پر آپ اس سے بیعت لیں گے ؟آپ صلی اللہ علیہ وسلم نے فرمایا: میں اس سے اسلام، ایمان اور جہاد پر بیعت لوں گا۔
عمرو بن حریثرضی اللہ عنہ سے مروی ہے، کہتے ہیں کہ مجھے میری والدہ نبی صلی اللہ علیہ وسلم کے پاس لے گئی( میں بچہ ہی تھا) آپ صلی اللہ علیہ وسلم نے میرے سر پر ہاتھ پھیرا اور میرے لئے رزق کی دعا کی۔(اور ایک روایت میں ہے: برکت کی دعا کی)۔
ابو امامہ باہلی رضی اللہ عنہ سے مروی ہے، کہتے ہیں کہ رسول اللہ صلی اللہ علیہ وسلم نے فرمایا: میری والدہ نے دیکھا ،گویا ان سے ایک نور نکلا ہے جس سے شام کے محلات روشن ہو گئے ہیں۔
آپ صلی اللہ علیہ وسلم نے فرمایا: میں نے جعفر بن ابی طالب رضی اللہ عنہ کو جنت میں فرشتے کی صورت میں اڑتے ہوئے دیکھا، فرشتوں کے ساتھ دو پروں کےذریعے۔ یہ حدیث ......... سے مروی ہے۔
عبداللہ بن عمر رضی اللہ عنہما کہتے ہیں کہ: نبی صلی اللہ علیہ وسلم نے فرمایا: میں نے بہت زیادہ کالی بکریاں دیکھیں، جن میں بہت زیادہ سفید بکریاں داخل ہوگئی ہیں۔ صحابہ نے کہا: اے اللہ کے رسول! آپ نے اس کی کیا تعبیر کی ہے؟ آپ صلی اللہ علیہ وسلم نے فرمایا: عجمی لوگ تمہارے دین اور نسب میں شامل ہو جائیں گے۔ صحابہ نے تعجب سے کہا: اے اللہ کے رسول! عجمی لوگ؟ آپ صلی اللہ علیہ وسلم نے فرمایا: اگر ایمان ثریا کے ساتھ معلق ہوتا توبھی عجم کے کئی لوگ اسے حاصل کر لیتے اور کتنے خوش نصیب لوگ ہوتے۔
جابر بن عبداللہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: میں نے(خواب میں) اپنے آپ کو دیکھا، گویا کہ میں ایک مضبوط زرہ پہنے ہوئے ہوں۔ اور ذبح کی ہوئی ایک گائے دیکھی، میں نے تعبیر کی کہ مضبوط زرہ مدینہ ہے اور گائے، واللہ! خیر ہے، آپ صلی اللہ علیہ وسلم نے اپنے صحابہ سے کہا: اگر ہم مدینے میں ٹھہرے رہیں اوراگر وہ یہاں داخل ہو جائیں تو ہم ان سےقتال کریں۔ صحابہ نے کہا: اے اللہ کے رسول صلی اللہ علیہ وسلم ! واللہ! وہ زمانہ جاہلیت میں ہمارے خلاف مدینے میں داخل نہ ہو سکے تو اب اسلام میں وہ ہمارے خلاف مدینے میں کس طرح داخل ہو سکتے ہیں؟ عفان نے اپنی حدیث میں کہا کہ: آپ صلی اللہ علیہ وسلم نے فرمایا: تب جو تمہاری مرضی، اور اپنی زرہ پہن لی، انصار نے کہا: ہم نے رسول اللہ صلی اللہ علیہ وسلم کی رائے رد کر دی، وہ آئے اور کہنے لگے: اے للہ کے نبی صلی اللہ علیہ وسلم ! جو آپ کی مرضی ،آپ صلی اللہ علیہ وسلم نے فرمایا: کسی نبی کے لائق نہیں کہ جب وہ اپنی زرہ پہن لے تو قتال کرنے سے پہلے اسے اتار دے
جابررضی اللہ عنہ سے مروی ہے کہ (رسول اللہ صلی اللہ علیہ وسلم نے فرمایا): میں نےدیکھا کہ میں جنت میں داخل ہوگیا ہوں۔ میں رمیصاء ابو طلحہ کی بیوی کے پاس سے گزرا، اور میں نے اپنے سامنے چلنے کی آواز سنی تو میں نے کہا: جبرائیل یہ کون ہے؟ جبرائیل نے کہا: یہ بلال ہے، اور میں نے ایک سفید محل دیکھا اس کے صحن میں ایک لڑکی تھی ۔ میں نے پوچھا یہ محل کس کے لئے ہے؟ جبرائیل نے کہا: عمر بن خطاب کے لئے۔میں نے اس میں داخل ہو کر اسے دیکھنے کا ارادہ کیا تو مجھے تمہاری غیرت یاد آگئی۔ عمررضی اللہ عنہ نے کہا: اے اللہ کے رسول صلی اللہ علیہ وسلم ! میرے ماں باپ آپ پر قربان! کیا میں آپ پر غیرت کروں گا ؟
عبداللہرضی اللہ عنہ سے مروی ہے، کہتے ہیں کہ رسول اللہ صلی اللہ علیہ وسلم نے فرمایا: میں اپنی امت کے لئے اس پر راضی ہوا جس پر ام عبد(عبد اللہ بن مسعود)کا بیٹا راضی ہوا۔
عروہ سے مروی ہے کہ عائشہ رضی اللہ عنہا نے کہا کہ رسول اللہ صلی اللہ علیہ وسلم نے فرمایا: زینب میری بہترین اور ایک روایت میں ہے :افضل بیٹی ہے، میری وجہ سے اسے تکلیف پہنچی ۔ یہ بات علی بن حسین تک پہنچی تو وہ عروہ کے پاس آئے اور کہنے لگے: یہ کونسی حدیث ہے جو مجھ تک پہنچی ہے،جس میں تم فاطمہ رضی اللہ عنہا کی تنقیص کر رہے ہو؟ عروہ نے کہا: مجھے یہ بات پسند نہیں کہ میرے لئے فلاں فلاں چیز ہو اور میں فاطمہ رضی اللہ عنہا سے اس کے حق میں کمی کروں ۔رہی یہ بات تو اس کے بعد مجھ پر تمہارے لئے لازم ہے کہ میں یہ حدیث کبھی بھی بیان نہیں کروں گا۔
ابو ہریرہرضی اللہ عنہ سے مرفوعاً مروی ہے کہ: میں نے اللہ عزوجل سے اپنی امت کی شفاعت کا سوال کیا تو اللہ تعالیٰ نے مجھ سے فرمایا: تمہارے لئے ستر ہزار ایسے لوگ ہیں جو بغیر حساب جنت میں داخل ہوں گے۔ میں نے کہا: اے اللہ ! مجھے مزید عطا کر، اللہ تعالیٰ نے فرمایا: تمہارے لئے اتنے ہیں اور اپنے دائیں بائیں اور سامنے ڈھیر لگادئے۔
عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: میں نے اپنے رب سے ایک سوال کیا، (بعد میں) چاہا کہ یہ سوال میں نے نہ کیا ہوتا۔ میں نے کہا: اے میرے رب! مجھ سے پہلے رسول تھے، ان میں سے کسی کے لئے آپ نے ہوا کو مسخر کر دیا، کوئی ایساتھا جو مردوں کو زندہ کرتا تھا( اور آپ نے موسیٰ علیہ السلام سے کلام کیا)۔ اللہ تعالیٰ نے فرمایا: کیا تم یتیم نہیں تھے میں نے تمہیں پناہ دی؟ کیا تم انجان نہیں تھے میں نے تمہیں ہدایت دی، (راستہ دکھایا) کیا تم محتاج نہیں تھے میں نے تمہیں غنی کر دیا؟ کیا میں نے تمہارا سینہ کشادہ نہیں کیا؟ اور تم سے تمہارا بوجھ نہیں ہٹایا؟ میں نے کہا: کیوں نہیں اے میرے رب! (تب میں نے خواہش کی کہ کاش میں اللہ تعالیٰ سے سوال نہ کرتا۔)
جابررضی اللہ عنہ سے مروی ہے کہ نبی صلی اللہ علیہ وسلم نے فرمایا: سید الشہداء حمزہ بن عبدالمطلب رضی اللہ عنہ ہیں، اور وہ شخص بھی ہے جو ظالم حکمران کے سامنے کھڑا ہوا اس نے اسے (اچھائی کا) حکم دیا اور (برائی سے) منع کیا۔ تو اس حکمران نے اسے قتل کر دیا۔
عبداللہ بن عباس رضی اللہ عنہما نے مرفوعاً بیان کیا کہ: مریم بنت عمران کے بعد اہل جنت کی سردار عورتیں فاطمہ ، خدیجہ اور آسیہ رضی اللہ عنہن زوجہ فرعون ہیں۔
عبدالرحمن بن عوفرضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: میں اپنے چچاؤں کے ساتھ مطیبین (حلف الفضول) کے حلف نامے میں موجود تھا۔ اس وقت میں بچہ ہی تھا، مجھے یہ بات پسند نہیں ہے کہ میرے لئے سرخ اونٹ ہوں اور میں اس (قسم نامہ) کو توڑ دوں۔
عبداللہ رضی اللہ عنہ سے مروی ہے، کہتے ہیں کہ میں رسول اللہ صلی اللہ علیہ وسلم کے پاس موجود تھا ،آپ صلی اللہ علیہ وسلم (نخع) کے اس قبیلے کے لئے دعا کر رہے تھے یا ان کی تعریف کر رہے تھے حتی کہ مجھے بھی خواہش ہوئی کہ میں ان کا ایک فرد ہوتا۔
