منہال بن عمرو ،یعلی رضی اللہ عنہ سے بیان کرتے ہیں، کہتے ہیں کہ: میں کسی شخص کے بارے میں گمان نہیں کرتا کہ اس نے رسول اللہ صلی اللہ علیہ وسلم کی ایسی چیزیں دیکھی ہوں ،جو میں نے دیکھی ہیں۔ پھر انہوں نے بچے، دو کھجوروں اور اونٹ کا واقعہ ذکر کیا۔ آپ صلی اللہ علیہ وسلم نے فرمایا کہ: تمہارے اونٹ کو کیا ہوا کہ تمہاری شکایت کررہا ہے؟ اس کا خیال ہے کہ پانی نکالنے کے لئے تم اسے رہٹ یا کنویں پر چلاتے رہے اور اب یہ بوڑھا ہوگیا ہے تو تم نحر کرنا چاہتے ہو [اسےنحر مت کرو، اسے اونٹوں میں چھوڑدو ان کے ساتھ رہے]۔
ام المومنین عائشہ رضی اللہ عنہا کہتی ہیں کہ: ہم نبی صلی اللہ علیہ وسلم کی ازواج آپ کے گرد جمع تھیں ۔ہم میں سے کوئی بھی پیچھے نہیں تھی۔ فاطمہ رضی اللہ عنہا چلتی ہوئی آئیں ۔ان کی چال رسول اللہ صلی اللہ علیہ وسلم کے مشابہہ تھی۔ جب آپ صلی اللہ علیہ وسلم نے انہیں دیکھا تو مرحبا (خوش آمدید) کہا، فرمانے لگے: میری بیٹی مرحبا ،پھر انہیں اپنے دائیں یا بائیں طرف بٹھا لیا۔پھر ان کے کان میں کوئی بات کہی تو وہ رونے لگیں، جب آپ نے انہیں غمگین دیکھا تو دوبارہ ان کے کان میں کوئی بات کہی، تو وہ ہنسنے لگیں۔ میں نے ان سے کہا: آپ صلی اللہ علیہ وسلم کی ازواج مطہرات میں سے میں نے کہا کہ: رسول اللہ صلی اللہ علیہ وسلم نے ہمارے درمیان تمہیں خاص طور پر ایک راز کی بات بتائی تو تم رونے لگیں۔ جب رسول اللہ صلی اللہ علیہ وسلم چلے گئےتو میں نے ان سے پوچھا:رسول اللہ صلی اللہ علیہ وسلم خاص رازداری کی کیا بات کی تھی؟ وہ کہنے لگیں :میں رسول اللہ صلی اللہ علیہ وسلم کاراز افشا نہیں کرنا چاہتی۔ جب آپ صلی اللہ علیہ وسلم فوت ہو گئے تو میں نے ان سے کہا: میں تمہیں اس حق کا واسطہ دیتی ہوں ،جو میرا تم پر ہے،کہ تم مجھے وہ بات بتاؤ ،کہنے لگیں: اب میں بتا دوں گی۔ انہوں نے بتایا کہ: جب پہلی مرتبہ آپ نے مجھ سے سر گوشی کی تو مجھے بتایا کہ: جبریل ہر سال ایک مرتبہ مجھ سے قرآن کا دور کیا کرتے تھے اور اس سال دو مرتبہ مجھ سے قرآن کا دور کیا ہے۔ میں اپنی موت قریب دیکھ رہا ہوں، اللہ سے ڈرتی رہنا اور صبر کرنا، کیوں کہ میں تمہارے لئے بہترین پیش رو ہوں گا۔ میں روپڑی جس طرح تم دیکھ رہی تھیں۔ جب آپ صلی اللہ علیہ وسلم نے مجھے غمگین دیکھا تو دوبارہ میرے کان میں سرگوشی کی، فرمانے لگے: فاطمہ!کیاتمہیں پسند نہیں کہ تم مومن عورتوں کی سردار بنو؟ یا فرمایا: اس امت کی مومن عورتوں کی سردار بنو؟ (تو میں ہنس پڑی جو کہ تم دیکھ رہی تھیں۔)
عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے کعبے کی طرف دیکھا تو فرمایا: تمہاری حرمت کتنی عظیم ہے ۔اور دوسری روایت میں ہے :جب رسول اللہ صلی اللہ علیہ وسلم نے کعبے کی طرف دیکھا تو فرمایا: اس گھر کو مرحبا ،تم کتنے عظیم اور تمہاری حرمت کتنی عظم ہے۔ جب کہ اللہ کے نزدیک مومن تم سے بھی زیادہ حرمت والا ہے۔اللہ تعالیٰ نے تمہاری ایک چیز حرام کی اور مومن کی تین چیزیں حرام کیں۔ اس کا خون، اس کا مال ،اور اس کے بارے میں برا گمان۔
عبداللہرضی اللہ عنہ سے مروی ہے، کہتےہیں کہ: میں رسول اللہ صلی اللہ علیہ وسلم کے لئے پیلو کی مسواک بنا رہا تھا۔ لوگ میری پتلی پنڈلیوں کو دیکھ کر ہنسنے لگے۔ نبی صلی اللہ علیہ وسلم نے فرمایا: تم کس وجہ سے ہنس رہے ہو ؟ لوگوں نے کہا: اس کی پتلی پنڈلیوں کی وجہ سے ۔آپ صلی اللہ علیہ وسلم نے فرمایا:(اس ذات کی قسم جس کے ہاتھ میں میری جان ہے!) یہ پنڈلیاں میزان میں احد پہاڑ سے بھی بھاری ہیں۔
عبداللہ بن مسعودرضی اللہ عنہ سے مروی ہے کہ: وہ پیلو کی مسواک کاٹ رہے تھے اور وہ پتلی پنڈلیوں والے تھے۔ ہوا چلی تو پنڈلیوں سے کپڑا ہٹ گیا۔ لوگ ہنسنے لگے۔ رسول اللہ صلی اللہ علیہ وسلم نے فرمایا: تم کس وجہ سے ہنس رہے ہو؟ کہنے لگے: اے اللہ کے نبی صلی اللہ علیہ وسلم اس کی پتلی پنڈلیوں کی وجہ سے ۔ آپ صلی اللہ علیہ وسلم نے فرمایا: اس ذات کی قسم جس کے ہاتھ میں میری جان ہے! یہ دونوں میزان میں احد پہاڑ سے بھی زیادہ بھاری ہیں۔
ام سلمہ رضی اللہ عنہ سے مروی ہے، کہتی ہیں کہ میں گواہی دیتی ہوں کہ رسول اللہ صلی اللہ علیہ وسلم نے فرمایا: جس نے علی رضی اللہ عنہ سے محبت کی اس نے مجھ سے محبت کی اور جس نے مجھ سے محبت کی اس نے اللہ سے محبت کی،اور جس نے علی سے بغض رکھا اس نے مجھ سے بغض رکھا اور جس نے مجھ سے بغض رکھا اس نے اللہ سے بغض رکھا۔
ابو ہریرہرضی اللہ عنہ سے مروی ہے، کہتے ہیں کہ رسول اللہ صلی اللہ علیہ وسلم باہر نکلے ۔آپ کے ساتھ حسن اور حسین تھے۔ ایک اس کاندھے پر دوسرا اس کاندھے پر۔ کبھی اسے بوسہ دیتے، کبھی اسےبوسہ دیتے، حتی کہ ہم تک پہنچ گئے ۔ایک آدمی نے آپ سے کہا: اے اللہ کے رسول! آپ ان سے محبت کرتے ہیں؟ آپ نے فرمایا: جس نے ان دونوں سے محبت کی اس نے مجھ سے محبت کی اور جس نے ان دونوں سے بغض رکھا اس نے مجھ سے بغض رکھا۔
عبدالرحمن بن جابر بن عبداللہ اپنے والد سے بیان کرتے ہیں کہ آپ صلی اللہ علیہ وسلم حرہ کے موقع پر باہر نکلے تو( ایک پتھر سے )آپ کے قدم مبارک کو ٹھوکر لگی۔ آپ نے فرمایا: برباد ہو وہ شخص جس نے اللہ کے رسول کو ڈرایا۔ (میں نے کہا: کس نے اللہ کے ر سول کو ڈرایا ہے)رسول اللہ صلی اللہ علیہ وسلم نے فرمایا: جس نے انصار کے اس قبیلے کو ڈرایا اس نے دونوں کے درمیان رہنے والوں کو ڈرایا۔ یعنی دونوں اطراف۔
صفیہ بنت ابی عبید رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: تم میں سے جو شخص یہ طاقت رکھتا ہو کہ مدینے میں مرے وہ مدینے میں ہی مرے کیوں کہ جو شخص مدینے میں مرا اس کی شفاعت کی جائے گی۔ یا اس کے لئے(ایمان کی ) گواہی دی جائے گی۔
عائشہ رضی اللہ عنہا سے مروی ہے، کہتی ہیں کہ: میں اپنے گھر میں تھی ،صحن میں رسول اللہ صلی اللہ علیہ وسلم اور آپ کے صحابہ بیٹھے تھے ،میرے اور ان کے درمیان پردہ حائل تھا ۔طلحہ بن عبیداللہ آئے تو رسول اللہ صلی اللہ علیہ وسلم نے فرمایا: جس شخص کو یہ بات پسند ہو کہ اس شخص کو دیکھے جو زمین پر چلتا ہو اور اپنا وعدہ (شہادت کا)بھی پورا کر تا ہو تو وہ طلحہ رضی اللہ عنہ کی طرف دیکھ لے۔
جابر بن عبداللہ رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: جو شخص اس بات کو پسند کرے کہ زمین پر چلنے والے کسی شہید کو دیکھے تو وہ طلحہ بن عبیداللہ رضی اللہ عنہ کو دیکھ لے
آپ صلی اللہ علیہ وسلم نے فرمایا: جس کا میں دوست ہوں، علی رضی اللہ عنہ بھی اس کا دوست ہے۔ اے اللہ !جو شخص علی رضی اللہ عنہ سے دوستی رکھے تو بھی اس سے دوستی رکھ، اور جو علی رضی اللہ عنہ سے دشمنی رکھے تو بھی اس سے دشمنی رکھ۔ یہ حدیث ...... مروی ہے
جریر رضی اللہ عنہ سے مرفوعاً مروی ہے کہ: مہاجرین دنیا اور آخرت میں ایک دوسرے کے دوست ہیں، اور فتح مکہ کے دن مسلمان ہونے والے قریش اور ثقیف کے آزاد کر دہ دنیا و آخرت میں ایک دوسرے کے دوست ہیں۔
عبداللہ بن عباس رضی اللہ عنہما سے مرفوعاً مروی ہے کہ: ہم آخری امت ہیں، لیکن سب سے پہلے حساب لیا جائے گا۔ کہا جائے گا: امی امت اور ان کا نبی کہاں ہے؟ پس ہم آخری اور پہلے ہیں۔
جفشیش کندی رضی اللہ عنہ سے مروی ہے، کہتے ہیں کہ: میں نے نبی صلی اللہ علیہ وسلم سے کہا: اے اللہ کے رسول صلی اللہ علیہ وسلم ! آپ کن سے تعلق رکھتے ہیں؟ آپ نے فرمایا: ہم بنو نضر بن کنانہ سے تعلق رکھتے ہیں ،ہم اپنی والدہ میں بھی شک نہیں کرتے اورنہ اپنے والدکی نفی کرتے ہیں ۔
خالد بن معدان رسول اللہ صلی اللہ علیہ وسلم کے صحابہ سے بیان کرتے ہیں کہ انہوں نے آپ صلی اللہ علیہ وسلم سے کہا: ہمیں اپنے بارے میں بتائیے۔ آپ صلی اللہ علیہ وسلم نے فرمایا: ٹھیک ہے ۔میں اپنے والد ابراہیم کی دعا اور عیسیٰکی خوشخبری ہوں ،میں اپنی ماں کے پیٹ میں تھا تو میری ماں نے ایک روشنی دیکھی جو ان سے نکلی، جس سے شام کے محلات روشن ہو گئے۔ مجھے بنی سعد بن بکر میں دودھ پلایا گیا۔ اس وقت میں وہاں بکریاں چرا رہا تھا کہ میرے پاس دو آدمی آئے، انہوں نے سفید کپڑے پہنے ہوئے تھے۔ ان کے پاس برف سے بھر اسونے کا ایک تھا ل تھا۔ ان دونوں نے مجھے لٹایا اور میرا پیٹ چیر دیا، پھر میرا دل نکال کر دونوں نے اسے چیرا اور اس سے ایک سیاہ لوتھڑا نکال کر پھینک دیا۔ پھر دونوں نے اس برف سے میرا دل اور پیٹ دھویا ۔جب خوب صاف کر دیا تو دوبارہ اسی جگہ رکھ دیا جس طر ح وہ پہلے تھا ۔پھر ایک نے دوسرے ساتھی سے کہا: اس کی امت کے دس آدمیوں سے اس کا وزن کرو، اس نے دس آدمیوں سے میرا وزن کیا تو میں ان پر بھاری رہا، پھر اس نے کہا: اس کی امت کے سو آدمیوں سے اس کا وزن کرو، اس نے سو آدمیوں کے ساتھ میرا وزن کیا تو میں ان پر بھاری رہا ،پھر اس نے کہا: اس کی امت سے ایک ہزار دمیوں سے اس کا وزن کرو، اس نے ایک ہزار آدمیوں کے ساتھ میرا وزن کیا تو میں ان پر بھاری رہا۔ پھر اس نے کہا: اسے چھوڑ دو، اگر اس کی ساری امت کے ساتھ بھی اس کا وزن کرو گے تو یہ ان پر بھاری رہے گا۔
عبادہ بن صامت رضی اللہ عنہ سے مروی ہے کہ کہا گیا: اے اللہ کے رسول صلی اللہ علیہ وسلم ! ہمیں اپنے بارے میں بتائیے ؟ آپ صلی اللہ علیہ وسلم نے فرمایا: ٹھیک ہے۔ میں ابراہیم کی دعا ہوں، اور جس نے سب سے آخر میں میری بشارت دی وہ عیسیٰ بن مریم ہیں
ابو ہریرہرضی اللہ عنہ سے مروی ہے، کہتے ہیں کہ ہم رسول اللہ صلی اللہ علیہ وسلم کے ساتھ تھے، (لوگ) گزرنے لگے ۔ رسول اللہ صلی اللہ علیہ وسلم فرماتے:ابو ہریرہرضی اللہ عنہ ! یہ کون ہے؟ میں کہتا :فلاں ۔آپ صلی اللہ علیہ وسلم فرماتے :فلاں اللہ کا نیک بندہ ہے۔ پھر کوئی گزرتا تو آپ فرماتے: ابو ہریرہ! یہ کون ہے؟ میں کہتا فلاں۔ آپ فرماتے: فلاں اللہ کا بندہ یہ تو برا آدمی ہے۔ حتی کہ خالد بن ولید رضی اللہ عنہ گزرے تو میں نے کہا: اے اللہ کے رسول صلی اللہ علیہ وسلم ! یہ خالد بن ولید رضی اللہ عنہ ہیں۔ آپ صلی اللہ علیہ وسلم نے فرمایا: خالد، اللہ کا بہت اچھا بندہ ہے۔ اللہ کی تلواروں میں سے ایک تلوار ہے۔
عباس بن عبدالمطلبرضی اللہ عنہ سے مروی ہے، انہوں نے کہا: اے اللہ کے رسول! کیا ابو طالب کو آپ سے کوئی فائدہ ہوگا؟ کیوں کہ وہ آپ کی حفاظت کرتے تھے اور آپ کے لئے (لوگوں سے )غصے ہوتے تھے۔ آپ صلی اللہ علیہ وسلم نے فرمایا: ہاں، وہ آگ کم گہرے حصے میں ہوگا۔ اگر میں نہ ہوتا( یعنی میری سفارش) تو وہ جہنم کے سب سے نچلے طبقے میں ہوتا۔
