بِذُنُوْبِهِمْ

ذَنَبُ الدَّآبَّۃِ وَغَیْرِھَا: چوپایہ وغیرہ کی دم کو کہتے ہیں۔ پھر اس کا اطلاق کم مرتبہ اور رذیل آدمی پر ہونے لگا ہے چنانچہ محاورہ ہے۔ ھُمْ اَذْنابُ الْقَومِ: یعنی وہ رذیل ہیں اور اسی سے بطور استعارہ ٹیلوں میں پانی کے راستوں کو مَذَانِبُ التِّلاعِ کہا جاتا ہے۔ اَلْمِذْنَبُ: لمبی دم والا گھوڑا۔دم دار ڈول سَجْلٌ کی طرح بطور استعارہ ذَنُوبٌ کے معنیٰ بھی نصیبہ اور حصہ آجاتے ہیں۔چنانچہ قرآن پاک میں ہے: (فَاِنَّ لِلَّذِیۡنَ ظَلَمُوۡا ذَنُوۡبًا مِّثۡلَ ذَنُوۡبِ اَصۡحٰبِہِمۡ ) (۵۲۔۵۹) کہ ان ظالموں کے لئے بھی(عذاب) کی نوبت مقرر ہے جس طرح ان کے ساتھیوں کی نوبت مقرر تھی۔ اَلذَّنْبُ: (ض) کے اص معنیٰ کسی چیز کی دم کو پکڑنا کے ہیں کہا جاتا ہے کہ ذَنَبْتُہٗ: میں نے اس کی دم پر مارا۔دم کے اعتبار سے ہر اس فعل کو جس کا انجام برا ہو اسے ذَنْبٌ کہہ دیتے ہیں اسی بنا پر انجام کے اعتبار سے گناہ کو تَبِعَۃٌ بھی کہا جاتا ہے۔ذَنْبٌ کی جمع ذُنُوبٌ ہے۔قرآن پاک میں ہے: (فَاَخَذَہُمُ اللّٰہُ بِذُنُوۡبِہِمۡ ) (۳۔۱۱) تو خدا نے ان کو ان کے گناہوں کے سبب(عذاب میں) پکڑلیا تھا۔ (فَکُلًّا اَخَذۡنَا بِذَنۡۢبِہٖ ) (۲۹۔۴۰) تو ہم نے سب کو ان کے گناہوں کے سبب پکڑلیا۔ (وَ مَنۡ یَّغۡفِرُ الذُّنُوۡبَ اِلَّا اللّٰہُ) (۳۔۱۳۵) اور اﷲ تعالیٰ کے سوا گناہ بخش بھی کون سکتا ہے۔ وَغَیرُ ذٰلِکَ مِنَ الْاٰیَاتِ۔