الْخٰسِرُوْنَ

اَلْخُسْرُ وَالْخُسْرانُ: رأس المال میں کمی آجانا خسارہ کی نسبت کبھی انسان کی طرف ہوتی ہے۔چنانچہ کہا جاتا ہے خَسِرَ (س) فُلاَنٌ فلاں نے نقصان اٹھایا۔اور کبھی فعل کی طرف ہوتی ہے۔ چنانچہ کہا جاتا ہے خَسِرَتْ تِجَارَتُہْ اس کی تجارت خسارہ میں ہے۔قرآن پاک میں ہے: (تِلۡکَ اِذًا کَرَّۃٌ خَاسِرَۃٌ ) (۷۹۔۱۲) یہ لوٹنا تو(موجب) زیاں ہے۔ عام طور پر اس کا استعمال خارجی ذخائر میں نقصان اٹھانے پر ہوتا ہے۔جیسا کہ مال و جاہ وغیرہ لیکن کبھی معنوی ذخائر یعنی صحت و سلامتی،عقل و ایمان و ثواب کھوبیٹھنے پر بولا جاتا ہے بلکہ ان چیزوں میں نقصان اٹھانے کو اﷲ تعالیٰ نے خسران مبین قرار دیا ہے۔ چنانچہ فرمایا: (الَّذِیۡنَ خَسِرُوۡۤا اَنۡفُسَہُمۡ وَ اَہۡلِیۡہِمۡ یَوۡمَ الۡقِیٰمَۃِ ؕ اَلَا ذٰلِکَ ہُوَ الۡخُسۡرَانُ الۡمُبِیۡنُ ) (۳۹۔۱۵) جنہوں نے اپنے آپ اور اپنے گھروالوں کو نقصان میں ڈالا۔دیکھو یہی صریح نقصان ہے۔ (وَ مَنۡ یَّکۡفُرۡ بِہٖ فَاُولٰٓئِکَ ہُمُ الۡخٰسِرُوۡنَ ) (۲۔۱۲۱) اور جو اس کو نہیں مانتے وہ خسارہ پانے والے ہیں۔ (الَّذِیۡنَ یَنۡقُضُوۡنَ عَہۡدَ اللّٰہِ مِنۡۢ بَعۡدِ مِیۡثَاقِہٖ ۪ وَ یَقۡطَعُوۡنَ مَاۤ اَمَرَ اللّٰہُ بِہٖۤ اَنۡ یُّوۡصَلَ وَ یُفۡسِدُوۡنَ فِی الۡاَرۡضِ ؕ اُولٰٓئِکَ ہُمُ الۡخٰسِرُوۡنَ ) (۲۔۲۷) جو خدا کے اقرار کو مضبوط کرنے کے بعد توڑدیتے ہیں۔۔۔۔یہی لوگ نقصان اٹھانے والے ہیں۔ (فَطَوَّعَتۡ لَہٗ نَفۡسُہٗ قَتۡلَ اَخِیۡہِ فَقَتَلَہٗ فَاَصۡبَحَ مِنَ الۡخٰسِرِیۡنَ ) (۵۔۳۰) مگر اس کے نفس نے اس کو بھائی کے قتل ہی کی ترغیب دی تو اس نے اسے قتل کردیا اور خسارہ اٹھانے والوں میں سے ہوگیا۔اور آیت کریمہ: (وَ اَقِیۡمُوا الۡوَزۡنَ بِالۡقِسۡطِ وَ لَا تُخۡسِرُوا الۡمِیۡزَانَ ) (۵۵۔۹) اور انصاف کے ساتھ ٹھیک تولو اور تول کم مت کرو میں ہوسکتا ہے کہ ماپ تول میں عدل و انصاف کو ملحوظ رکھنے اور ظلم ترک کرنے کا حکم ہوا اور یہ بھی ہوسکتا ہے کہ ان افعال کے ارتکاب سے منع کیا ہو جو قیامت کے دن میزان عمل میں کمی کا موجب ہوں جس کی وجہ سے آدمی ان لوگوں سے ہوجائے جن کے متعلق قرآن پاک نے: (وَ اَمَّا مَنۡ خَفَّتۡ مَوَازِیۡنُہٗ ) (۱۰۱۔۸) کہا ہے۔ یہ دونوں معنیٰ باہم لازم ملزوم ہیں۔ اور جہاں کہیں قرآن پاک میں خْسرانَ کا لفظ آیا ہے وہ اسی دوسرے معنیٰ پر محمول ہے دنیوی کاروبار اور دیگر چیزوں میں نقصان اٹھانا مراد نہیں ہے۔