غَيْرِ

غَیْرُ: کا لفظ کئی طرح پر استعمال ہوتا ہے۔ (۱)محض نفی کے لیے یعنی اس سے کسی دوسرے معنی کا اثبات مقصود نہیں ہوتا جیسے، مَرَرْتُ بِرَجُلٍ غَیْرِ قَائِمٍ: یعنی میں ایسے آدمی کے پاس سے گزرا جو کھڑا نہیں تھا۔ قرآن پاک میں ہے۔ (وَ مَنۡ اَضَلُّ مِمَّنِ اتَّبَعَ ہَوٰىہُ بِغَیۡرِ ہُدًی مِّنَ اللّٰہِ) (۲۸:۵۰) اور اس سے زیادہ کون گمراہ ہوگا جو خدا کی ہدایت کو چھوڑ کر اپنی خواہش کے پیچھے چلے۔ (وَ ہُوَ فِی الۡخِصَامِ غَیۡرُ مُبِیۡنٍ ) (۴۳:۱۸) اور جھگڑے کے وقت بات نہ کرسکے۔ (۲) بمعنی اِلَّا جو مستثنیٰ کے لیے آتا ہے۔ اس صورت میں یہ نکرہ کی صفت بن سکتا ہے۔ جیسے مَرَرْتُ بِقَوْمٍ غَیْرِ زَیْدٍ: یعنی میں زید کے علاوہ دوسری قوم کے پاس سے گزرا۔ قرآن پاک میں ہے۔ (مَا عَلِمۡتُ لَکُمۡ مِّنۡ اِلٰہٍ غَیۡرِیۡ) (۲۸:۳۸) میں تمہارا اپنے سوا کسی کو اﷲ نہیں جانتا۔ (مَا لَکُمۡ مِّنۡ اِلٰہٍ غَیۡرُہٗ) (۷:۶۵) اس کے سوا تمہارا کوئی معبود نہیں۔ (ہَلۡ مِنۡ خَالِقٍ غَیۡرُ اللّٰہِ ) (۳۵:۳) کیا خدا کے سوا کوئی اور خالق (اور رازق) ہے۔ (۳) کسی چیز سے صرف اس کی صورت یعنی وصف کی نفی کرنے کے لیے آتا ہے۔ جیسے اَلْمَائُ اِذَا کَانَ حَارًّا غَیْرُہٗ: اَذَا کَانَ بَارِدًا۔ کہ پانی گرم ہونے کی حالت میں ٹھنڈے کا غیر ہوتا ہے۔ قرآن پاک میں ہے۔ (کُلَّمَا نَضِجَتۡ جُلُوۡدُہُمۡ بَدَّلۡنٰہُمۡ جُلُوۡدًا غَیۡرَہَا ) (۴:۵۶) جب ان کی کھالیں گل (اور جل) جائیں گی تو اور کھالیں بدل دیں گے۔ (۴) یہ کہ وہ نفی ذات کو بھی شامل ہو۔ جیسے فرمایا: (اَلۡیَوۡمَ تُجۡزَوۡنَ عَذَابَ الۡہُوۡنِ بِمَا کُنۡتُمۡ تَقُوۡلُوۡنَ عَلَی اللّٰہِ غَیۡرَ الۡحَقِّ ) (۶:۹۳) آج تم کو ذلت کے عذاب کی سزا دی جائے گی اس لیے کہ تم خدا پر جھوٹ بولا کرتے تھے۔ یعنی باطل بہتان بندیاں کرتے تھے۔ (وَ اسۡتَکۡبَرَ ہُوَ وَ جُنُوۡدُہٗ فِی الۡاَرۡضِ بِغَیۡرِ الۡحَقِّ ) (۲۸:۳۹) اور وہ اس کے لشکر ملک میں ناحق مغرور ہورہے تھے۔ (اَغَیۡرَ اللّٰہِ اَبۡغِیۡ رَبًّا) (۶:۱۶۴) کیا میں خدا کے سوا اور پروردگار تلاش کروں۔ (وَیَسۡتَبۡدِلۡ قَوۡمًا غَیۡرَکُمۡ) (۴۷:۳۸) اور تمہاری جگہ اور لوگ پیدا کرے گا۔(1) (ائۡتِ بِقُرۡاٰنٍ غَیۡرِ ہٰذَاۤ ) (۱۰:۱۵) (یا تو ) اس کے سوا کوئی قرآن (بنا) لاؤ۔ اور تَغْیِیْر کا لفظ بھی دو طرح استعمال ہوتا ہے ایک صرف کسی چیز کی صورت کو بدلنا جیسے غَیَّرْتُ دَارِیْ یعنی میں نے اپنے گھر کی شکل و صورت بدل دی۔ دوم کسی دوسری چیز سے تبدیل کرلینا جیسے: غَیَّرْتُ غُلَامِیْ وَدَابَّتِیْ یعنی میں نے اپنا غلام یا جانور دوسرے سے تبدیل کرلیا۔ قرآن پاک میں ہے۔ (اِنَّ اللّٰہَ لَا یُغَیِّرُ مَا بِقَوۡمٍ حَتّٰی یُغَیِّرُوۡا مَا بِاَنۡفُسِہِمۡ) (۱۳:۱۱) خدا اس نعمت کو جو کسی قوم کو حاصل ہے نہیں بدلتا جب تک کہ وہ اپنی حالت کو نہ بدلیں۔ اور لفظ غَیْرُ اور مُخْتَلِفٌ: میں معنوی لحاظ سے فرق یہ ہے کہ غیر کا مفہوم لفظ مختلف سے زیادہ عام ہے کیونکہ جب ہم یہ کہتے ہیں کہ یہ چیز دوسری کی غیر ہے تو ان دونوں چیزوں کا بلحاظ جوہر کے مختلف ہونا ضروری نہیں ہے۔ بلکہ تغایر فی الوصف کی صورت بھی میں ایک دوسری کا غیر کہا جاسکتا ہے مگر ایک چیز کو دوسری سے مختلف اس صورت میں کہا جاسکتا ہے جبکہ ان دونوں میں تغایر بلحاظ جوہر کے پایا جائے۔ بس اس سے واضح ہوتا یہ کہ ہر جگہ مختلفین کو متغائرین تو کہہ سکتے ہیں مگر ہر موقعہ پر متغایرین کو مختلفین نہیں کہہ سکتے۔